Maindie Films :D

Ano nga ba ang pinagkaiba ng mainstream movies sa mga Independent films?. Tayo ay magbalik tanaw sa  mga nasabi sa naganap na Cinemalaya Congress. Mahalaga pa ba ang Indie films makalipas ang pito hanggang walong taon? Ito ang mga katanungang naglalaro sa ating mga isipan. 

Base sa aking mga natutunan sa pagpunta sa naganap na Congress noong July 25-26 na ginanap sa CCP sinasabi nila na ang  isa sa pagkakaiba nang dalawa ay ang budget na ginagamit sa pagbuo ng pelikula. Sinasabi na ang mainstream movies ay umaabot sa 30 milyon pataas samantalang ang mga malayang pelikula ay 2 hanggang mga 3 milyon lamang. Kung ating iisipin napakalaki nang agwat o pagitan ng dalawang klase ng pelikula pagdating sa budget ngunit para sa akin oo malaki ang papel nito sa pagbuo ng pelikula ngunit ito ay di nangangahulugang hindi maaring maipakita o maiparating ng mga independent directors ang mga nais nilang ipakita sa pelikulang ginawa. Kung tutuusin may mas malalim pa nga itong mensahe sa mga manunuod. Aaminin ko na noong unang beses kong nakapanuod ng indie film nasabi kong wala namang kwenta sapagkat una,  hindi ko kilala ang mga artista. Aminin naman natin na tayong mga Pilipino minsan mas inuuna kung sino ang mga magsisiganap sa pelikula kumpara sa nilalaman ng istorya. Ngunit sa paglipas ng mga panahon unti-unting nabuksan ang aking murang isipan sa mga realidad na dapat mas napapansin sa ating lipunan. Mas naipapakita sa mga independent films ang tunay na sitwasyon o kalagayan ng ating bayan at ng mga Pilipino sa kasalukuyan. Hindi kagaya ng mainstream minsan mas malimit alam na natin ang magiging takbo ng pelikula sapagkat napakarami nang kagaya at paulit ulit na lamang ang istorya, ang nagiiba na nga lamang ay ang pangalan ng bida at ng mga lugar kung saan ito isinasagawa.

Sa paglipas ng panahon, masasabi kong unti-unti ng nasasakop ng mainstream ang mga Independent films. Wala naman akong masamang pagtingin sa mainstream sinasabi ko lang ang mga bagay na aking napupuna. Noon, hindi kilala o sikat ang mga karakter na gumaganap sa mga malalayang pelikula at maging ang mga direktor.  Marami ang mas nabibigyan ng oportunidad na maipakita ang kanilang husay sa pag-arte o talento sa pagdidirek sa isang pelikula, ngunit ano na ba ang lagay sa kasalukuyan? Unti-unti at dahan-dahang pumapasok ang mga malalaking pangalan ng showbiz sa mga independent films kaya minsan naitanong ko sa aking sarili na kung nararapat pa ba itong tawaging independent film dahil lumalakas na ang imlpuwensya ng mga mainstream dito. Nakakalungkot isipin na ito ay nangyayari ngunit ito ang katotohanan.

Kung ako ang tatanungin na matapos ang 7 hanggang walong taon mahalaga pa rin ba ang mga independent films, ang aking isasagot ay walang patumanggang OO. naniniwala ako na napakahalaga ng papel ng independent films sa pagunlad ng industriya ng pelikulang Pilipino. May mga bagay na bawal ipakita sa mainstream ngunit sa pagkakaron ng Indie films ay mas nailalahad o mas napapakita ang tunay na kalagayan ng ating bansa sa panahon ngayon. Ito rin ay sumasalamin sa tunay na buhay ng mga tao kung kaya ay mas maraming tao ang nakakarelate o naihahambing ang kanilang mga sarili sa mga taong nagsisispagganap. Gaya nga ng nasabi sa congress na aking napuntahan araw araw may ipinapanganak na magagaling at mahuhusay na direktor, artista kaya ako ay naniniwala na kahit ilan pang unos at pagsubok ang haharapin ng mga ito naniniwala pa din akong mas magtatagal at mas dudumugin pa ang mga Independent films.

Bilang isang tao at Pilipino na may pagmamahal sa industriya ng pelikula ako ay patuloy pa rin na susuporta sa mga susunod pang panaahon dahil sumasang-ayon ako na hindi kelangan ng label o ng katawagan tulad na lamang ng mainstream o indie dahil iisa lang naman ang ating lahi, iisa lang din ang ating minimithi ito ay walang iba kundi mapagtibay ang pelikulang Pilipino.  Hindi magkaaway ang dalawa at hindi dapat pinagsasabong sapagkat tayo ay Pilipino ang mga pelikulang ito maging Mainstream man o Indie ay iisa lang ang lahi ng mga gumawa at nagsisiganap sabi nga sa forum hindi sila magkaaaway ang kaaway ay sina Batman, Harry Potter, Spiderman madaling salita ang mga Foreign movies na mas sinusuportahan pa ng mga Pilipino kumpara sa sariling atin.  Kaya tayo ay maging matalino sa pagpiling mga pelikula at suportahan natin ang sariling atin. Mabuhay ang Independent  at Mainstream film! Mabuhay ang pelikulang Pilino! J